لو نمشي طول العمر
كاظم اسماعيل الكاطع, شعر شعبي عراقي.
اللّي إمضيٌع ذهبْ
بالغربهْ شِفت التَعب وإتعلٌمت معناه
وإتعلٌمت عالسهرْ .. والسكتهْ .. والصفناهْ
ذلٌيت ذلْ النهر من ينكَطع مجراهْ
وإعرفت كل شي إعرفتْ
حتىٌ النخلْ ينحني لريح السفرْ من يجي
وجايب غريب إوياهْ
ألله !! يا هالوطن شمسٌوي بيٌه ألله
نيرانه مثل الثلجْ
كلما تدكْ عالضلعْ
أبرد وكَول إشٌاهْ
إللٌي إمضيٌع ذهب!!
بسوكَ الذهبْ يلكَــــــاهْ
وإللي مفاركْ محبْ ...
يمكن سنهْ وينســــــاهْ
.. والطاح منٌه الكَلبْ
قلب إصطناعي إنلكًه ويشكٌلونه إهنـــاهْ
بس إل مضيٌع وطــــــــــــــنْ
وين الوطن يلكَـــــــاه ؟ ؟ ؟
* * *
آه ياوطن يا خبز يالشارتك تكتل !!
آه يا وطن يا طفل ..
هِنياله منْ صاغ إلك نبض الكَلب جنجل !!
يا وطن .. زٌفة كَمر
ياعراق زَفة كَمر
ونجوم إلهْ إتهلهلْ !!
عذبٌني ما عذبٌك ..
إكتلتني ما أكتلك ..
طبع اليحب ينكتل موش اليحب يكتل
***
آه يا وطن يا جَذِر !!
والجذر هم بيه طبع ..
لو مات من العطش للوادي ماينزل !!
علٌمني إل فراق
أعزف لحن غربتي إبقيثارة أشواقْ
أسهر \ وحن\ وأنفعل
وأتمنىٌ واشتاق
مامش مثل ديرتي
لو نمشي طول العمر !!!
مانلكًه مثل إعراقنا إعراق!!!
.........................
تدك = تدق
الكَلب = القلب
ينكَطع = ينقطع
يلكَاه = يلقاه
وكَول = وقول
كَمر = قمر
ينكتل = ينقتل
يكتل = يقتل
إكتلتني = قتلتني
ما أكتلك = ما أقتلك
إنلكَه = لُقي , وُجِد
مانلكَه = لا نلقى
.....................
المصدر دورية العراق .. منقول لان روووعه مرة
الرئيسية 
البوابة 
أحدث الصور 
الأحد أبريل 27, 2008 8:49 am
